الحلقة السـادسـة مـن قصـة "المـوت قـدرك " لميـريهـان عمـر

صحيت مفزوعه  على اصوات كتير حواليا
ولقيت نفسي فى اوضتى وعلى السرير وفى  ستات كتيره حواليا  قاعدين
دورت بين وشوشهم على امى  بس مكنتش موجوده
سألت واحده جمبي عنها قالتلى
- هناديهالك يابنتى حاضر
قمت قعدت على السرير  وانا ببص للستات اللى كانوا كلهم على لسانهم
( حمدالله على سلامتك )
لمحت أمى اللى بمجرد مالقتنى قاعده على السرير جريت خدتنى بالحضن
- حمدالله على سلامتك ياقلب امك خضتينى عليكي
- هو ايه الل حصلى ياماما ؟!
-  من يومين  رحت اعملك اللمون زى ماقولتلك  ورجعت  لقيتك نايمه وجسمك مولع جامد وسخنه  اوى وبتتنفضي
فضلت اعملك فى كمدات  بس مفيش فايده  بعت اختك جابت دكتور الوحدة وقال ان عندك حمي  ولازم تنزل درجات الحراره
وكان بيديكى حقن عشان الحراره  تنزل بس  كانت اول ماتنزل ترجع تانى 
- بقالى فى الحاله دى قد ايه ؟؟!!!!!!!!
- النهارده الاتنين  والحاله دى من يوم الجمعه عندك
- ياااه  ده انا كأنى نايمه  مكنتش حاسه بحاجه  خالص
قربت من  ودنها  وسالتها
- مين الناس  دول ؟؟
- دول  جيرانا وحبايبي لما عرفوا انك تعبانه  جم يطمنوا عليكي
- طيب لو سمحتى كده خديهم برا  عشان عاوزه ارتاح شويه واغير هدومى
كنت حاسه بدوخه شديدة وجسمي متكسر وده مش منطقى   لانى المفروض اكون اقوى من الاول بكتير  ايه سبب الضعف اللى سيطر على جسمي ؟
مش قادره  افسر ولاافهم ايه اللى  حصلى فى اليومين اللى فاتو  دول
قمت من السرير ودورت فى الكتب اللى كنت حطاها فى دولابي اخدتها ورجعت على السرير
قدرت اعرف منها ان سبب حالتى  دى اتصالى بالشيطان
ودى نتيجه طبيعية  اخدت دش وطلبت من امى تحضرلى الاكل كنت جعانه جدا
اكلت كتير جدا على غير العادى
وبدأت الطاقه ترجع لجسمى مره تانيه
لحد مابقي  جسمي اقوى من اى وقت عديت بيه فى حياتى كنت حاسه انى جاهزه جدا للحياه الجديده
مسكت موبايلى  اللى كان عليه اكتر من اتصال من كرامة     .......
يبقي فى حاله جديده وانا اللى اتأخرت عليها

جبت الاسم ودوست اتصال  وبعد ثوانى  ردت كرامه :
- الو ..ايه يافاطمة ياختى انتى فين ياحبيبتى  انتى رجعتى فى كلامك ولا ايه
- لا  ياست كرامة كنت تعبانه بس شويه  ...خير في ايه ؟؟
- انا عملت ياختى زى ماطلبتى منى بالظبط  ونهيت كل القديم
دلوقتى بقي فى ناس اكابر جاينلى  بكره  بعد الضهر وعندهم مشكلة هتيجي زى اتفاقنا ونبدأ الشغل ولا ايه
- قبل الضهر هكون عندك ...
- ماشي ياختى انا مستنياكى
- ماشي سلام
- سلام
اكدت على خليفة وفهمته  يستعد لان عندنا شغل بكرة  بليل وانه يستنى منى  تليفون
وقضيت الليله وانا مستنيه بكره يجي بفارغ الصبر
دخلت  عند كرامة  اللى كانت مستنيانى  قبل الضهر
واكدت عليها انى  مينفعش ابان فى اى حاله من الاحوال وانى لازم افضل  مجهولة  للناس
هتدخلينى  بعد مايحكو حكايتهم  وانا هقولك يعملو  ايه بالتفصيل

________________
الحاج  سيد ابو المكارم  اكبر تاجر مواشي فى المنصوره  معاه فلوس تشتري المنصوره كلها
مرات ابنه  عندها  مشكله فى الخلفة وراحت لاكتر من 20  دكتور ومفيش فايده  كل الدكاتره اجمعوا ان معندهاش اى حاجه تمنعها من الخلفة
وانهم بعد مايأسوا وهى بقالها اكتر من 5 سنين متجوزة ونفسهم يشوفوا لابنهم حتت عيل صغير قرروا انهم يجوا للست كرامة  صاحبه العلامات والبركات  تشوف ليهم حل  وانه مستعد يدفع من  10 الاف  لـ100 الف بس مرات ابنه تجيب عيل

سمعت كرامه كل التفاصيل وبقت قاعده محتاره تنطق باى كلمه 
قامت بهدوء شديد وبثقه استغربت من قدرتها على تمثيل دور المبروكه وصاحبه  البركات بالدقه دى بس هى فعلا خبيره  فى التمثيل اكتر من عشر سنين بتحاول تكون شيخة بجد وقدرت بالغش  والكدب فعلا انها توصل لناس كتير
خرجت  كرامة من الاوضه
والناس قاعدين مستنين وفى عيونهم نظره استعطاف انها تشوف حل ليها
دخلت ووقفت قدامى وسألتنى
- ها هنعمل ايه ؟!!!

غمضت عينى دقايق وبدأ الكلام  يخرج من بين  شفايفي تدريجيا  وكأن حد خلانى اتكلم مكنتش قادره اسيطر حتى على اللى  بقوله الصوت صوتى بس الكلام معرفهوش

-  معمول ليها عمل مرمى فى ميه عذبه وصعب اننا  نجيبه معمولها  بتعطيل الحمل وفراق الزوج   اللى عاملاه اسمها على حرف (ن )   مطلوب منها تجيب حاجه من قطرها  وانا هفكه ليها  وتقوليلها انها لازم تنزل  قبر عيل  صغير مدفون بقالو فتره بسيطه
 وتنام جمبه  لو مش هيعرفوا يتصرفوا احنا نتصرف وباقى الخطوات عليا انا ؟!!
هيدفع  ليكي 20 الف  جنيه قبل منحط ايدينا فى اى حاجه  ونتصرف وفهيمهم ان  الخطوات مش سهله  وعاوزه قلب ميت وانها لازم تنزل الليله  بعد نص الليل
كان بالنسبالى الرقم خيالى انى اول لما ابدأ اطلب المبلغ ده  وفى احتمال كبير  ان الراجل يرفض بس كانت مغامره من ضمن المغامرات الكتير اللى بعملها

خرجت  كرامة تقولهم نفس الكلام  اللى قولته بالحرف ووفعلا الناس وافقوا  وكان معادهم بعد نص  الليل عند المقابر بتاعت البلد عندنا زى مافهمتها  
اتصلت على خليفه وفهمته ان لازم يحضر الطلب اللى قولت عليه قبر عيل صغير  مدفون من قريب وان يفتح القبر ويجهزوا ويستنانا
خليفه معترضش ابدا وده خلق جوايا  ثقه بزياده  انى بقيت فعلا قادره اتحكم فى تفكير  وتصرفات اللى قدامى
كنت حاسه بطاقه وقوه عجيبه بتحركنى
**
جه المعاد المنتظر كنت لبست  نقاب وخمار طويل من عند كرامة  لانى مكنتش حابه حد يعرفنى  وخليت كرامة تنادينى قدامهم باسم  تانى
وخرجت معاها  لقينا الناس مستنينا فى عربيه سوده  كان  الحاج سيد   ومرات الحاج سيد ومرات ابنه  
طلبت منه  كرامة الفلوس قبل مانتحرك من قدام البيت  خدت كرامه الفلوس ودخلت شالتهم جوا البيت
وورجعت بسرعه  ركبنا معا ه العربيه  ومشينا فى الطريق للمقابر  كان اهالى البلد كعادتهم نايمين من بعد صلاه العشاء
وانا خرجت من البيت زى مابخرج كل مره من الشباك
دخلنا المقابر وكان خليفه مستنينا  شاورلنا من بعيد
وطلبت منهم ان البنت بس اللى تيجي معانا وهم يفضلوا فى العربيه
خدت البنت فى ايدي اللى كانت فى حاله من الرعب والخوف
صعب على انسان  طبيعي انه ينزل قبر وينام فيه زي الميتين  بالظبط وخصوصا  انه  فى نص الليل حتى لو كان معاه ناس كتير
 وصلنا قدام القبر اللى فتح خليفه بابه بصوت قوى  زلزل الصمت  اللى فى المكان
كان الهدوء مخيم على المكان مفيش اى حاجه غير صوت الهوا واوراق الشجر  وافرع الشجر اللى بتتهز مع الهوا وصوت  الفروع اللى بتكسر تحت رجلينا
نورلها خليفه بكشاف كبير كان معاه ونزلت البنت  اول سلمه وهى مرعوبه وبتترعش نزلت معاها وطلبت منها تنام جنب الكفن الابيض الصغير  كان لطفل بيبي صغير مدفون بقالو اسبوع
نامت جمبه وطلبت منها انها  تمد دراعها ومسكت مشرط كان فى جيب عبايتى وفتحت شق فى دراعها ونزلت قطرات الدم على الكفن الابيض وحطيت  بعض من دهن الخروع ودم  لطائر كانوا معايا وكنت محضراهم  على الكفن ليختلط بالدم بتاعها  وطلبت منها ترضع الطفل الميت
بصيتلى بخوف وباستغراب قولتها هيرضع  منك اسمعى الكلام وخلصى عشان محدش يحس بينا
كانت فى حاله من الرعب والخوف نفذت الامر منى  وفعلا حست وكان الطفل بيرضع من صدرها صرخت جامد  ووقعت من الصدمه عدلت هدومها ورجعت الطفل لمكانه وناديت على خليفه
يشيلها  وطلعنا بيها للناس وقولت ليهم على الخطوه الباقيه
انها تاخد  ازازه كنت محضراها  وتدهن جسمها بيها  3 مرات لمده 3 ايام وبعدين  تغسل جسمها بميه مركونه يومين  فى اليوم الرابع وبعد كده   تكون مستعده للحمل
شكرنا الناس جدا وخدوها ومشيوا
 طلبت من خليفه يرجع القبر زى ماكان ويقفله كويس ويحصلنا على بيت كرامة
وصلنا بيت كرامه وقسمنا الفلوس وكان خليفه وصل وخدت فلوسي واديت لكل واحد فلوسه ومشيت فى طريقي للبيت

***
تانى يوم وصلت الكليه وعرفت من سهام  ان  يوسف عجبه جدا البحث بتاعى وسال عنى فى المحاضرات وطلب منهم انهم يبلغونى انه عاوزنى فى مكتبه  بمجرد مااوصل  كنت حاسه انى مبسوطه اوى اوى  والفرحه مش سيعانى يوسف اخيرا  هيتحقق الحلم بتاعى واتكلم معاه واقف قدامى كان برغم كل القسوه  اللى بحس بيها بس كان بالنسبالى هو نقطة ضعف جوايا
رحت ليوسف المكتب وخبطت على الباب

- اتفضل ......
- مساء الخير يادكتور
- انا فاطمة المحلاوى  ..اللى كنت ...
- ايوه ايوه ..تعالى اتفضلى اقعدى
 قعدت وانا من جوايا  مبسوطه جدا برغم  الارتباك اللى كان واضح عليا
-  انا  بقالى  سنين فى الكليه وقريت اكتر من بحث بس بصراحه عمرى ماقريت بحث وحسيت ان اللى كاتبه حاضر الموقف
وكأنه موجود جوا الحاله وعنده شغف وحب ليها بالدرجه دى ؟!!
البحث بتاعك  خلانى متشوق اعرفك اكتر واتكلم  معاكي كتير
- متشكره لحضرتك اوى       .
- العفو ده الحقيقه  ..انا تحت امرك فى اى وقت تعوزى منى  اى حاجه  تعاليلى وانا تحت امرك
- شكرا ليك يادكتور اكيد طبعا ليا الشرف اتعلم من حضرتك  اكتر واكتر
- زى   ما اتفقنا بقي فى اى وقت هستناكى
- اكيد يادكتور ان شاء الله  ..هستأذن واسيب حضرتك عشان  معطلكش
وخرجت وانا مبسوووطه وقلبي بيدق  مبسوطه اوى اوى وفرحانه
مرت ايام كتيره وكنت بحاول انى اقرب منه على قد مااقدر
كان كل يوم بيعلقنى بيه اكتر واكتر كنت بحبه من كل قلبي
كان شاغل تفكيرى وروحى برغم انى عارفه انى عمرى ماهبقي ليه  برغم اننا قربنا من بعض بسبب البحث بتاعى اللى عجبه  جدا الا انى عارفه انى مينفعش اقرب منه واخد مساحه اكتر من كده كنت بشوف فى عنيه اعجاب ونظره حب بس كنت برجع أأكد لنفسي ان ده وهم وغلط  مصيري غير  مصيره مكنتش اعرف ان مصيرنا مرتبط ببعض .....

اكتر من 6 شهور وانا شغاله كل يوم فيهم مع كرامه  فى حل مشاكل الناس ومقابل كل ده كنت باخد اللى  اقدر عليه  من الفلوس لحد ماكونت مبالغ  كبيره  بس برغم كل الفلوس اللى بقت  معايا  كنت لسه بشتغل فى تغسيل الاموات مع امى عشان متعتى الخاصه  بريحه الموت  احساس مختلف تماما غير اى حاجه بعملها تانيه فى حياتى
وبرضو اهو تمويه عشان محدش يقدر يحس بتغير عليا
كنت بقضي حياتى الصبح فى الكليه افضل ابص ليوسف من بعيد  
كنت بحبه جدا لدرجه انى كنت بتمناه كل يوم  عن اليوم اللى قبله 

 وبليل بين القبور
سحر اسود مدفون  ..بتلجأ ليه بعض الستات اللى عاوزه تعطل حمل واحده واللى  عاوزه تأذي اخت جوزها او حماتها
اللى عاوزه تخرب علاقه واحد  بمراته  او واحد عاوز يأذى علاقه ست بجوزها
اللى عاوزة ترجع لجوزها واللى عاوزه تعجل حملها  واللى عاوزه جوزها خاتم فى صوابعها
اعمال بتتزرع بين الجثه والكفن واعمال تانيه بتتعمل جوا فم الميت  بيدفن
واعمال تانيه بناخد من  عضم الجثث وندقها ونحطها فى حجاب
فى اللى بنسقيه للكفن وفى اللى بنرويه بيه  تراب القبر وفى اللى كان بيحتاج  ضحيه نضحي بيها للشيطان عشان يحل ليه ازمته
***
ايوه عارفه انى انسانه تشمئز منها بس زى ماقولتلك قبل  كده انا اتخلقت  غير الناس ومكنش ينفع اكون غير كده
مكنش عندى مشكله فى انى انتهك حرمه ميت 
انا دفعت تمن كبير اوى من عمرى عشان اقدر اوصل لكل ده  اوصل لانى ابقي مخاويه الشيطان   ساحره متقنه جدا السحر بكافه انواعه  عبده للشيطان وزوجه ليه فى بعض الاحيان جزء منى وجزء منه بيتحرك على الارض....
اتطور الموضوع جدا  واتحول لحاجات مكنتش حطاها فى حسابي  كان سهل صيد واحد  اهبل من دفعتنا  من النوعيه اللى تقدر تشتريها  بالفلوس وتقدر تخليه  هو اللى فى الصوره
كنت ببيع  جثث الميتين  للطلبة  يعملوا عليها ابحاث  ويقوموا بتشريحها فى الخفاء وبعد كده يرجعوها تانى بعد ماينتهوا منها  وكان فى اللى بيعوز اجزاء بس من الجثه وكان سهل جدا على دكتوره تشريح تديله من الجثه اللى هو عاوزو
لحد ماجالى فى يوم اتصال غريب من كرامه قالتلى  ان فى واحد مستعجل على طلب مننا ولازم فى اقرب وقت
ولو ينفع الليله هو معندوش مانع  هيدفع 10 الاف جنيه 
قلقت جدا من مكالمتها  كنت وقتها فى الكليه  ركبت اول عربيه ونزلت على بيتها علطول

دخلتنى  وقالتلى  ان عطوه المرغنى  اتصل بيها  وكان عطوة ده راجل اتعاملنا معاه فى كذا  حاله  وكنا بعنالو اكتر من جثه
وقال ان فى زبون هيدفع لينا 10 الاف جنيه  مقابل جثه واحده ست  بس مش هياخدها هيقعد معاها ساعتين اتنين بس؟!
حاولت افهم من كرامه عاوز الجثه  يعمل بيها ايه قالتلى معرفش وعطوة كمان ميعرفش استغربت والقلق بدأ يسيطر عليا
اتصلت بخليفه وسالتو عن جثث ستات جتله قريب؟
قالى ان فى جثه هتدفن النهارده بعد صلاه المغرب  جايه من قريه جنبينا لواحده ست وانه كان بيجهز القبر دلوقت للدفن
قلتله طيب اعمل حسابك بعد مالناس يمشوا تفتح القبر تانى عشان الجثه  دى عاوزنها

طبعا ممكن تستغرب من طاعه خليفة اللى  كان خايف فى يوم من الايام من كرامة وطاعته العمياء ليا دلوقتى لا وبيساعدنى فى اننا ننتهك حرمه انسان مات  ..بس الفلوس ليها تأثير مختلف جدا على اى حد  داق مراره الفقر

فضلت انا وكرامه نحاول نفهم من عطوه بس برضو مفهيمناش الراجل ده عاوز ايه  المهم كل اللى فهمناه منه ان عاوز الجثه فى حته عندنا غير القبر  وياريت لو نجيبها بيت كرامه
كان اننا  نجيب جثه لبيت كرامه شئ شبه مستحيل وخصوصا اننا ممكن نلفت نظر اهالى البلد او ان حد ياخد باله وده فى خطر كبير علينا
بس برضو دول 10 الاف جنيه  مينفعش نرفضهم  بسهوله
رتبت مع كرامه طريقه  لدخول الجثه ولخروجها
وطلبت  من عطوه يجيب الراجل ويجي الساعه 2 بليل
رتبنا كل التفاصيل وجه الوقت المنتظر
وقت ال10 الاف جنيه

كانت الجثه لبنت  غايه فى الجمال  كان واضح انها شابه لسه صغيره يمكن تكون 16 او 17  سنه 
مددناها فى غرفه فى بيت  كرامة  وكانت الغرفه ليها شباك عالى بيطل على الصاله
 كنت متعمده اننا ندخلها الاوضه دى  لانى عاوزه اعرف هو هيعمل ايه بالظبط
وصلت عربيه فخمه جدا ونزل منها رجل واضح عليه انه غنى جدا ومعاه فلوس كتيره اوى
اختفينا كلنا من الصاله ودخل معاه  عطوه للاوضه اللى كنا  حاطين فيها  الجثه
خرج عطوه واستنا ناحيه العربيه  اما كرامه كانت قاعده فى اوضه تانيه وقافله على نفسها  وخليفه مستنينى على تليفون انه يجي يرجع الجثه لمكانها

إتاكد الراجل الغنى من عدم وجود حد فى البيت  بنظرات سريعه للصاله الكبيره  وقفل الباب عليه بالمفتاح من جوا
ودخل للاوضه  وقفت على كرسي كنت حطاه فى الشباك العالى اللى بيبص للصاله
كانت الجثه ممده  على السرير والراجل واقف قدامها يتأملها زى العيل  الصغير
وبدأ بخلع ملابسه واحده واحده   وبدأ بازاحه الكفن عن الجثه 

كانت الصدمه بالنسبالى متوقعه مكانتش بالقوه اللى المفروض تكون عليها
نيكروفيليا * مرض مضاجعة الموتى *
منتشر بطريقه ما  فى مجتماعتنا العربيه مرض ماهو الا نوع من انواع الشذوذ الجنسي الغير مبرر الاسباب عجز جميع الطباء والعلماء ابداء اسباب لوجوده وانتشاره

وقفت اتأمل اللى كان بيعلمه الراجل وانا حاسه بالقرف مش اكتر  وجت فى دماغى تفصايل عشقي للاموات
هل ممكن اكون زيه مريضه بنفس الشذوذ
بس انا عمرى مافكرت بالجثث بالطريقه دى ؟!!!
 مقدرتش اكمل ابص واشوف اللى الراجل عمله فى البنت اللى كانت  فى حاله استسلام تام 
مش بتقاوم  لتدافع عن شرفها اللى بينتهكه كيس من الفلوس المتحركه حيوان  بشكل ادمى
بعد حوالى ساعتين وانا فى حاله ذهول حسيت بالباب بيتفتح

وخرج الراجل وهو بيعدل هدومه  وبيمسح العرق من على جبينه
خرجت كرامه من الاوضه على صوت عطوه اللى ندهلها وادها شنطه فيها الفلوس واتحركت العربيه ومشي الراجل بعد جريمته اللى لاتغتفر

دخلت الاوضه اللى كان فيها الراجل كان الكفن مقطع من  على جسم البنت وجسمها عاري قدامى تماما
قربت منها والدموع نازله على خدى  كان جوايا الم بيعتصر كيانى نار بجسمي وسخونه شديده فى كيانى
حاولت الم الكفن واقفله عليها مره تانيه
وقعدت جنبها على الارض جنب السرير 

حطيت راسي على صدرها وبدأت اشم ريحتها  املا منى انى اشم ريحه الموت اللى كانت بتمدنى بالقوه والمتعه بس كانت ريحه مختلفه كانت ريحه الحيوان اللى كان بيلمس جسمها ويغتصب حرمته
انمحت  من دماغى كل حاجه وكل الاسباب اصبحت فى حاله من عدم الشعور والادراك
وقفت مصدمه وكان حياتى بمساوئها شريط بيمر قدامى

بصيت لوشها  اللى كان عليه علامات الغضب   عدلت جسمي وانا ببص ليها فى ذهول
بدأ جسمها فى الحركه  وبدأت وكانها اتعدلت فى نومتها وقعدت نصف قعده على السرير
وفتحت عنيها اللى كان كاسيها البياض
وصوت انين  وكانها بتتألم.... صوت  مميت  ملا المكان حواليا  
والكفن بتاعها  نزل من على جسمها وفجأه بدأ يتحرك واحده واحده  ناحيتى  واتلف وكانه تعبان  بيتلف  حوالين ايديا  ورجليا  قيـد جديد  اتلف حوالين رقبتى  بيخنقنى   

لا لا لا خرجونى من هناااااا   .............!!!!!!!!